தொடக்கம்

 

2021 ன் தொடக்கத்தில் எனக்கான ஒரு வலைப்பூவை தொடங்கி எழுத வேண்டும் என்பதே என் முதல் எண்ணமாக இருந்தது. ஜூலை மாதம்தான் எழுதத் துவங்கினேன். 

தாமதம் என்று நினைக்கலாம். என்னைப் பொருத்தவரை இது இயல்பானதே. எதையும் நினைத்ததும் செய்யக்கூடிய இயல்பு எனக்குக் கிடையாது. உணர்ச்சிவசப்பட்டு செய்கிறேனா என்ற பரிசீலனைக்குப் பிறகே எப்போதும் செய்கிறேன். எழுத்து மட்டும் இதிலிருந்து விதிவிலக்கு.

இப்படி ஒவ்வொரு செயலையும்,ஒவ்வொரு வார்த்தையையும் பலமுறை யோசித்தே தீர வேண்டிய வாழ்க்கை சூழல் பெண்களுக்குரியது. பெண்ணியம் பேசுவதாக சலித்துக்கொள்ள வேண்டாம். இந்த இயல்புதான் என் எழுத்து செயல்பாட்டின் ஆதாரமாக சொல்வேன். இல்லை என்றால் என் வாழ்க்கை எழுத்தல்லாத பாதையில் எங்கோ சென்று ஒன்றுமில்லாததாக மாறியிருக்கும்.

இங்கு பெண்களின் சிறு சிறகசைப்பும் உன்னிப்பாக கவனிக்கப்படுகிறது. அது மிகச்சரியாக அவர்கள் அறியாமலேயே களையப்பட வேண்டியதாக முதலில் தாய்  தந்தையர்களை சமூகமும், குடும்பமும் எச்சரிக்கின்றன. "பொம்ளப்பிள்ளய எதுக்கு பள்ளிக்கூட புத்தகத்து மேல கதை புத்தகங்கள் படிக்கவிடனும். சொன்னப்பேச்சு கேக்காது ...வீட்டு வேலையப்பழக்குங்க...என்பதை எங்கள் அய்யா அதிகமாக கேட்டிருப்பார் என்று நினைக்கிறேன். 

தோட்டச்செடிகளை அளவாக இடத்திற்கு ஏற்ப வெட்டுவதைப்போல பெண்கள் குடும்பத்திற்கு ஏற்ப வார்க்கப்பட வேண்டியவர்கள் என்ற மனநிலை வலுவாக இருக்கும் சூழலில் தான் இன்னும் இருக்கிறேன். வேலைக்கு செல்வதற்காக படிக்கலாம். மற்றபடி வாசிப்பதெல்லாம் வேலையற்ற வேலை அல்லது வேலையில்லாதவர்கள் நேரத்தை கழிப்பதற்காக செய்வது. கல்லூரி முடித்து விடுதியிலிருந்து வீட்டிற்கு வந்ததிலிருந்து வாசிப்பதை பின் எழுதுவதை அழுத்தமானதாக உணர்ந்தேன். தற்பொழுது அழுத்தமில்லாததாக எனக்கு நானே மாற்றிக்கொண்டிருக்கிறேன்.

ஆண்களுக்கு என்ன மாதிரியான சிக்கல் என அவர்கள்தான் எழுத வேண்டும்.

இந்த ஆண்டு எனக்கு, எழுத்தில் மீண்டும் புதிய நம்பிக்கையை,புதிய சாளரங்களை திறந்த ஆண்டு என்று சொல்வேன். தொடர்ந்து சிறுகதைகளையும், அவ்வப்போது வாசிப்பனுபவக் கட்டுரைகளையும் எழுதிக்கொண்டிருந்த நான் புரவி இதழிற்காக நான்கு நேர்காணல்கள் செய்தேன். 

நான் வாசித்த நாவல்களில் என் ரசனைக்கும் வாசிப்பிற்கும் உகந்த நாவல்களை மனதில் கொண்டு செய்த நேர்க்காணல்கள் இவை. அந்தந்த நேரத்தில் மனதில் எழுந்த நாவல்களை கருத்தில் கொண்டு, மனதை மறுக்காமல் மனதிற்கு நேர்மையாய் செய்யப்பட்டவை.

முதன்முதலாக எழுத்தாளர் சுனில் கிருஷ்ணன் நேர்காணல். அவரின் அம்புப்படுக்கை சிறுகதை தொகுப்பையும்,நீலகண்டம் நாவலையும் மையப்படுத்தி எடுக்கப்பட்டது. இரண்டாவதாக எழுத்தாளர் ம.நவீன் நேர்காணல். அவரின் பேய்ச்சி நாவலை மையப்படுத்தி எடுக்கப்பட்டது. மூன்றாவதாக எழுத்தாளர் யுவன் சந்திரசேகர் நேர்காணல் அவரின் கானல் நதி நாவலை மையப்படுத்தியது. நான்காவதாக எழுத்தாளர் எஸ்.ராமகிருஷ்ணன் நேர்காணலானது அவரின் துயில் நாவலை மையப்படுத்தி எடுக்கப்பட்டது. இந்த நேர்க்காணல்கள் எனக்கு முக்கியமானவை.

ஏனெனில் என் வாசிப்பு என்ற அகவயமான ஒன்றை புறவயமாக்கி கேள்விகளாக முன்வைக்க முடியும் என்று அதற்கு முன் நான் நம்பியிருக்கவில்லை. இந்த நேர்காணலிற்கான புத்தகங்களை தேர்வு செய்யும் சுதந்திரத்தை புரவிஆசிரியர் கார்த்திகேயன் வெங்கட்ராமன் எனக்கு அளித்திருந்ததால் இதை செய்தேன். இல்லையென்றால் மறுத்திருக்க வாய்ப்புண்டு.

எழுத்தாளர் எம்.கோபாலகிருஷ்ணன் ,தமிழினி இணையஇதழில் 'சிறுகதை இன்று' என்ற கட்டுரைத் தொடர் எழுதுகிறார். அதில் என் கதைகளை குறித்து கதைசொல்லாத கதைகள் என்ற கட்டுரை வெளியாகியுள்ளது . மூத்த எழுத்தாளர் ஒருவருக்கு... என் எழுத்தின் மீதான புரிதல் உற்சாகத்தை அளிக்கிறது.

தொடர்ந்து சிறுகதைகள் எழுதியபடி இருக்க வேண்டும் என்று நான் எழுத தொடங்கிய போது நினைத்துக் கொண்டேன். அதை இந்த ஆண்டும் செய்யமுடிந்திருக்கிறது.

2012 லிருந்து இரண்டு மூன்று ஆண்டுகள் ஆசிரியவேலைகளுக்கான தேர்வுகளில் ஓரிரண்டு மதிப்பெண்களில் தவறிக்கொண்டிருந்தேன். அந்த காலகட்டத்தில் இலக்கிய புத்தக வாசிப்பை நிறுத்தி வைத்திருந்தேன். வாசிக்கத்துவங்கியதிலிருந்து இத்தனை மாதங்கள் தொடர்ந்து வாசிக்காமல் இருந்ததில்லை.

அரசியல் ஆடுகளத்தில் சில காய்கள் வெட்டுபடத்தான் செய்யும் என்பது புரிந்த பிறகு தேர்வுக்காக படித்த புத்தகங்களை கட்டி எடுத்து அதை இன்னொருவருக்கு மொத்தமாக கொடுத்துவிட்டேன். அதற்குள் உள்ளே ஏற்பட்டிருந்த  என் உடல்நல பாதிப்பை நான் அறியவில்லை. 

மிக உற்சாகத்துடன் எழுத்தாளர் ஜெயமோகனின் 'நாவல் கோட்பாட்டிலிருந்து' மீண்டும் வாசிப்பை தொடங்கினேன். ஒருக்கட்டத்தில் வாசிக்க முடியாமல் ஆனது. வலிப்பிரச்சனைகளால் இருமுறை அவசரசிகிச்சை பிரிவிற்கு செல்ல வேண்டியிருந்து. அந்த நாட்களில் எழுதத்தொடங்கலாம் என்ற எண்ணம் மனதில் ஓடிக்கொண்டிருக்கும். 

தீவிரமாக மருந்து எடுத்துக்கொண்டிருந்த ஆண்டுகளில் காடு,விஷ்ணுபுரம்,வெண்முரசு,துயில், கானல்நதி,புதுமைப்பித்தன் கதைகள், இன்னும் பல நாவல்களை அதே தீவிரத்துடன் வாசித்தேன்.

2016 டிசம்பரில் என் முதல் கதை 'விடாய்' சொல்வனத்தில் பிரசுரமானது. 2019 ல் ஜனவரியில் என் முதல் சிறுகதை தொகுப்பான 'சக்யை' வாசகசாலை பதிப்பாக வெளியானது. தொடர்ந்து குருதியுறவு,கடுவழித்துணை என அடுத்தடுத்த ஆண்டுகளில் சிறுகதை தொகுப்புகள் வெளிவந்தன. 

கடல் சிறுகதை தொகுப்பு 2022 ஜனவரி இரண்டாம் நாள் வாசகசாலை வெளியீடாக வருகிறது. 

2012 லிருந்து 2021 வரை ஒரு சுற்று தீவிரமான வாழ்க்கை நகர்ந்திருக்கிறது. இன்று அதற்கு முன் இருந்த  sofisticated ஆன பெண் அல்ல நான். புறத்தில் அதிக எண்ணிக்கையிலான உறவுகள் சூழ, அகத்தளவில் மிகத்தனித்தவளான எனக்கு, வாழ்க்கை சில கேள்விகளை பரிசாகத் தந்திருக்கிறது. இலக்கியம் இன்னும் இன்னும் தீவிரமான நிகர் அனுபவங்களை ஏராளமாக வழங்கியிருக்கிறது.

 இந்த ஆண்டும் அதே பழைய கனவுதான். மிகஇளமையிலிருந்தே என் கனவான 'எழுத வேண்டும்' என்பது.  இதில் அடுத்ததாக என்ன செய்யமுடியும் என்று முயற்சிக்க வேண்டும். எழுத்து வாசிப்பு சார்ந்தே என் வாழ்வின் முக்கியமான முடிவுகளை எடுக்கிறேன். அவை எந்த அளவிற்கு லௌகீக தெளிவுள்ளவை என்று தெரியவில்லை.

ஒரு சாதாரண நடுத்தரவர்க்க பெண் இங்கே தனிப்பட்ட கலைஇலக்கிய செயல்பாடுகளுக்கான இடத்தை அடையவேண்டுமென்றால், சமூகத்தை, வீட்டை பொறுமையாக, அமைதியாக கையாள்வதே புத்திசாலித்தனம் என்று சொல்வேன். தன்னை விமர்சனம் செய்பவர்களை, தன்னுடைய அறிவு செயல்பாடுகளுக்காக தன்னை புண்படுத்த நினைப்பவர்களை அன்பின் பெயரால் மன்னிக்க வேண்டியிருக்கிறது.

ஆண் பெண் என்ற வேறுபாடு இல்லாது எழுத்து கலை சார்ந்த செயல்பாடுகளில் உள்ள அனைவருக்குமே இது மாதிரியான சவால்கள் நிறைய உண்டு.

அதையெல்லாம் கடந்துதான் ....எழுத்தெல்லாம் சுடராகி எரிய வேண்டும் என்று கவிஞன் உரத்துசொல்கிறான்.

இனிய புத்தாண்டு வாழ்த்துகள்.